Dagsetning                       Tilvísun
14. jan. 1991                              211/91

Virðisaukaskattur af þjónustu hafnarvogar og sölu á köldu vatni.

Vísað er til bréfs yðar, dags. 7. janúar 1991, þar sem spurt er:

(1)        hvort þjónusta hafnarvogar (vogargjöld) sé talin til virðisaukaskattsskyldar starfsemi og

(2)        hvort sala á köldu vatni samkvæmt mælum til atvinnustarfsemi, t.d. fiskvinnslufyrirtækja sé virðisaukaskattsskyld.

Til svars erindinu skal eftirfarandi tekið fram:

Samkvæmt 2. málsl. 2. mgr. 2. gr. reglugerðar nr. 248/1990, um virðisaukaskatt af skattskyldri starfsemi opinberra aðila, er starfsemi hafnarsjóða ekki skattskyld nema að því leyti sem um er að ræða sölu á vörum eða skattskyldri þjónustu í samkeppni við atvinnufyrirtæki. Að áliti ríkisskattstjóra verður ekki talið að meginstarfsemi hafnarvoga sé í samkeppni við atvinnufyrirtæki. Vísast í þessu sambandi til 2. gr., sbr. 3. gr. reglug. nr. 489/1990, um vigtun sjávarafla, þar sem þess er krafist að allur afli sem kemur á land skuli veginn á hafnarvog í eigu viðkomandi hafnar. Samkvæmt þessu skal ekki innheimta virðisaukaskatt af endurgjaldi fyrir þjónustu hafnarvogar.

Starfsemi vatnsveitu er ekki skattskyld nema að því leyti sem hún selur vöru eða skattskylda þjónustu í samkeppni við atvinnufyrirtæki, sbr. 2. málsl. 2. mgr. 2. gr. reglug. nr. 248/1990. Sala á köldu vatni til atvinnustarfsemi er því ekki virðisaukaskattskyld starfsemi, hvort sem vatn er selt samkvæmt mæli eða á annan hátt.

Virðingarfyllst,

f.h. ríkisskattstjóra,

Ólafur Ólafsson.