Dagsetning Tilvísun
2. mars 1998 843/98
Virðisaukaskattur – aðgangur að hlutafélagaskrá og samvinnufélagaskrá
Vísað er til bréfs yðar, dags. 13. febrúar sl., þar sem óskað er eftir áliti ríkisskattstjóra hvort innheimta skuli virðisaukaskatt af aðgangi að hlutafélagaskrá og samvinnufélagaskrá.
Í bréfi yðar kemur fram að aðgangur að skránum verði með tvennum hætti, þ.e. annars vegar aðgangur til eigin nota og hins vegar aðgangur í gegnum miðlara. Meðfylgjandi bréfinu er nýsett reglugerð, um aðgang að hlutafélagskrá og samvinnufélagaskrá og gjaldtöku. í 1. og 2. gr. reglugerðarinnar er kveðið á um að með samningi við Hagstofuna geti félög, einstaklingar og stofnanir fengið aðgang að hlutafélagskrá og samvinnufélagaskrá gegn greiðslu gjalds. Greitt skal árgjald að upphæð 180.000 kr. sem felur í sér heimild til 600 fyrirspurna og síðan 300 kr. gjald fyrir hverja fyrirspurn umfram það innan ársins.
Til svars bréfi yðar skal tekið fram að ríki, bæjar- og sveitarfélögum og stofnunum eða fyrirtækjum þeirra er skylt að innheimta virðisaukaskatt og standa skil á honum í ríkissjóð, að svo miklu leyti sem þessir aðilar selja vörur eða skattskylda þjónustu í samkeppni við atvinnufyrirtæki, sbr. 4. tl. 1. mgr. 3. gr. laga nr. 50/1988, um virðisaukaskatt. Að áliti ríkisskattstjóra ber að skilja ákvæði þetta þannig að gjaldtaka ríkisstofnana vegna starfsemi sem þær hafa með höndum í krafti opinbers valds hafi ekki í för með sér skyldu til að innheimta virðisaukaskatt, enda er þá ekki á valdi annars en viðkomandi stofnunar að veita sambærilega þjónustu með sömu réttar-áhrifum. Jafnframt felst í ákvæðinu að þjónusta sem opinber stofnun veitir án þess að henni sé það skylt skv. lögum er ekki skattskyld nema sambærilega þjónusta sé einnig veitt af atvinnufyrirtækjum.
Ljóst er samkvæmt framansögðu að Hagstofu Íslands ber ekki að innheimta og skila virðisaukaskatti af gjaldtöku fyrir aðgang að skrám stofnunarinnar.
Hvað varðar aðgang að skránum í gegnum miðlara þá er það álit ríkisskattstjóra að það eitt hafi ekki áhrif á skattskyldu til virðisaukaskatts enda skal þá miðlari fyrir hönd Hagstofunnar krefja viðskiptavini sína um gjaldið og skila því til Hagstofunnar sbr. 1. gr. sbr. 2. gr. reglugerðar nr. 94/1998, um aðgang að hlutafélagaskrá og samvinnufélagaskrá og gjaldtöku. Hvað 600 fyrstu fyrirspurnirnar varðar er litið svo á að miðlari hafi fyrirframgreitt gjald til Hagstofunnar vegna þeirra og geti því á sama hátt haldið því utan skattverðs á reikningum til viðskiptavina.
Samkvæmt framansögðu er það álit ríkisskattstjóra að ekki beri að innheimta virðisaukaskatt af aðgangi að umræddum skrám Hagstofu Íslands og skiptir þá ekki máli hvort stofnunin sjálf innheimtir gjaldið eða miðlari.
Virðingarfyllst,
f.h. ríkisskattstjóra,
Vala Valtýsdóttir.