Dagsetning Tilvísun
28. maí 1990 86/90
Virðisaukaskattur af þjónustu við erlenda aðila.
Vísað er til bréfs yðar; dags. 6. apríl sl., þar sem fram koma sjónarmið félagsins um ofangreint efni.
Af þessu tilefni sendist félaginu hér með ljósrit af reglugerð sem fjármálaráðherra gaf út 2. maí sl. um virðisaukaskatt af þjónustu fyrir erlenda aðila og af aðkeyptri þjónustu erlendis frá.
Reglugerðin skiptist í tvo aðalkafla – í fyrsta kafla er að finna ákvæði sem undanþiggja sölu tiltekinnar þjónustu til erlendra aðila virðisaukaskattsskyldri veltu – í öðrum kafla eru ákvæði um greiðslu virðisaukaskatts af sömu þjónustu þegar hún er keypt erlendis frá.
Undanþága skv. I. kafla tekur til viðskipta frá og með l. janúar sl. Skilyrði fyrir undanþágu skv. I. kafla eru að selt sé til aðila sem hvorki hefur búsetu né starfsstöð hér á landi og
a) þjónustan sé nýtt að öllu leyti erlendis
eða
b) kaupandi gæti – ef starfsemi hans væri skráningarskyld hér á landi samkvæmt lögum um virðisaukaskatt – talið virðisaukaskatt vegna kaupa þjónustunnar til innskatts, sbr. 15. og ·16. gr. laganna. Í þessu tilviki þarf kaupandi að sýna fram á hvers konar atvinnurekstur hann hefur með höndum, sjá nánar 2. mgr.1. gr. reglugerðarinnar.
Þjónusta sem er í tengslum við starfsemi aðila, eignir, réttindi eða hagsmunagæslu hér á landi fellur að áliti ríkisskattstjóra ekki undir a-lið, þ.e. þá telst hún nýtt að einhverju eða öllu leyti hér á landi. Í þessum tilvikum gæti undanþága hins vegar byggst á b-lið.
Sem dæmi um þjónustu sem telja má að nýtt sé að hluta eða að öllu leyti hér á landi má nefna málflutningsstörf fyrir íslenskum dómstólum, innheimtumál gegn íslenskum skuldurum, milligöngu um einkaleyfa-, mynstur- eða vörumerkjaskráningu, gæslu hagsmuna erlendra erfingja sem kalla til arfs í íslensku dánarbúi, álitsgerðir um íslenskar réttarreglur, t.d. vegna viðskiptahagsmuna hér á landi, svo og aðstoð vegna fyrirhugaðra kaupa eða stofnunar fyrirtækis hér á landi.
Varði þjónusta eitthvert þeirra atriða sem tilgreind eru í 3. gr. reglugerðarinnar skal – þrátt fyrir undanþáguákvæði l. og 2. gr. – ávallt telja söluna til skattskyldrar veltu. Þannig skal t.d. telja endurgjald fyrir lögfræðiþjónustu sem varðar fasteign hér á landi til skattskyldrar veltu. Tekið skal fram að vinna sem varðar fasteign á erlendri grund er undanþegin skattskyldri veltu skv. 4. tölul. l. mgr. 12. gr. laga um virðisaukaskatt.
Virðingarfyllst,
f.h. ríkisskattstjóra
Ólafur Ólafsson.