Dagsetning Tilvísun
8. ágúst 1996 746/96
Virðisaukaskattsskylda í hótelrekstri
Vísað er til bréfs yðar, dags. 6. júní 1996, þar sem þér fyrir hönd viðskiptavinar yðar, félags sem hefur með höndum hótelrekstur, óskið eftir úrskurði embættisins um virðisaukaskattsskyldu þess.
Málavextir eru þeir að félagið rekur hótel og selur hótelgistingu. Engin matsala er á hótelinu utan þess að þeir sem þess óska geta fengið morgunverð án sérstaks gjalds. Morgunverðurinn er innifalinn í gistiverðinu og skiptir engu, hvort gestir nýta sér hann eða ekki – verðið er hið sama.
Því er spurt, hvort það að bjóða gestum upp á morgunverð án þess að greitt sé sérstaklega fyrir hann, sé veitingasala í skilningi laga um virðisaukaskatt. Hvort telja megi að aðeins sé um hluta af gistiþjónustu að ræða og innheimta 14% virðisaukaskatt, eða hvort skylt sé að tilgreina morgunverð sérstaklega á reikningi og innheimta 24,5% virðisaukaskatt af honum og 14% af gistingu.
Ef umbjóðandi yðar kýs að gefa fólki morgunverð þá telst það afhending án endurgjalds og ber honum þá að skila virðisaukaskatti af morgunverðinum. Skv. 2. mgr. 8. gr. laga nr. 50/1988, um virðisaukaskatt, skal við afhendingu vöru eða þjónustu án endurgjalds miða skattverð við almennt gangverð í sams konar viðskiptum. Liggi almennt gangverð ekki fyrir skal miða skattverð við reiknað útsöluverð þar sem tekið er fullt tillit til alls kostnaðar að viðbættri þeirri álagningu sem almennt er notuð á vörur eða þjónustu af sama tagi.
Ef gisting er seld með morgunverði án þess að kaupandi hafi frjálst val um að kaupa gistingu eða morgunverð sitt í hvoru lagi, ber að innheimta 24,5% virðisaukaskatt af heildarandvirði, þrátt fyrir að meginreglan sé sú að gisting beri 14% virðisaukaskatt.
Ef gisting er seld sérstaklega og kaupandi getur valið um það hvort hann kaupir morgunverð eða ekki, ber að innheimta 24,5% virðisaukaskatt af morgunverðinum og 14% af gistingunni.
Í 3. gr. reglugerðar nr. 554/93, um virðisaukaskattsskylda sölu af vörum til manneldis o.fl., segir:
“Veitingahús, mötuneyti og hliðstæðir aðilar sem selja tilreiddan mat og þjónustu til almennings skulu innheimta 24,5% virðisaukaskatt af sölu sinni á vörum og þjónustu.
Smásöluverslanir, söluturnar og aðilar sem hafa með höndum tilfallandi matsölu og geta því ekki aðgreint aðföng vegna matsölu frá aðföngum til heimilis-halds, teljast ekki til veitingahúsa, mötuneyta eða hliðstæðra aðila skv. 1. mgr.”
Ríkisskattstjóri getur ekki fallist á að sala á morgunverði sé hluti af gistingu sem beri sama skatthlutfall og hún. Samkvæmt framansögðu ber viðskiptavini yðar að innheimta 24,5% virðisaukaskatt af sölu morgunverðar. Hótelrekstur hans telst til hliðstæðra aðila sbr. 1. mgr. tilvitnaðrar greinar. Ekkert er því til fyrirstöðu að aðgreina matföng vegna matsölu frá öðrum aðföngum vegna rekstrarins þar sem um hótelrekstur er að ræða en ekki gistingu í heimahúsi.
Samkvæmt 4. mgr. 20. gr. laga nr. 50/1988, um virðisaukaskatt, skal aðgreina á reikningi skattskylda sölu eftir skatthlutföllum, þannig að heildarverð vöru og þjónustu ásamt virðisaukaskatti komi sérstaklega fram vegna hvors skatthlutfalls. Því ber að aðgreina gistingu og morgunverð á reikningi.
Virðingarfyllst,
f.h. ríkisskattstjóra,
Vala Valtýsdóttir