Dagsetning Tilvísun
28. sept. 1994 644/94
Virðisaukaskattur af liðveislu við fatlaðan einstakling, sbr. 25. gr. laga nr. 59/1992, um málefni fatlaðra.
Vísað er til bréfs yðar dags 12. sept. s.l. þar sem spurst er fyrir um, hvort leggja beri virðisaukaskatt á liðveislu við fatlaðan einstakling.
Í 25. gr. laga nr. 59/1992, um málefni fatlaðra segir: “ Í sérstökum tilvikum skal veita fötluðum einstaklingum frekari liðveislu sem felur í sér margháttaða aðstoð við ýmsar athafnir daglegs lífs, enda sé hún nauðsynleg til að koma í veg fyrir dvöl á stofnun. Svæðisskrifstofur taka ákvörðun um frekari liðveislu samkvæmt heimildum fjárlaga hverju sinni að fenginni umsögn svæðisráða.“
Samkvæmt 2. tölul. 3. mgr. 2. gr. laga nr. 50/1988, um virðisaukaskatt, er félagsleg þjónusta undanþegin virðisaukaskatti. Þar sem þjónusta sú er um ræðir í samningi þeim er bréfinu fylgdi, fellur undir lög um málefni fatlaðra telst hún undanþegin virðisaukaskatti.
Virðingarfyllst,
f.h. ríkisskattstjóra,
Vala Valtýsdóttir