Dagsetning Tilvísun
11. desember 1996 771/96
Virðisaukaskattur af þjónustu við gúmmíbjörgunarbáta
Vísað er til bréfs yðar, dags. 14. október 1996, þar sem spurst er fyrir um, hvort þjónusta við eftirlit og endurnýjun gúmmíbjörgunarbáta skipa og búnaði þeim tengdum, sé undanþegin virðisaukaskatti skv. 7. tl. 12. gr. laga um virðisaukaskatt.
Í bréfi yðar kemur fram að um er að ræða félag sem selur þjónustu í formi reglubundins og tilfallandi eftirlits og endurnýjunar á gúmmíbjörgunarbátum skipa og búnaði þeim tengdum. Vinna þessi og þjónusta fer alfarið fram á starfsstöð félagsins, það sér hvorki um að taka bátana niður, né að setja þá upp aftur.
Til skattsskyldrar veltu telst ekki viðgerðar- og viðhaldsvinna við skip og fastan útbúnað þeirra. Sama gildir um efni og vörur sem það fyrirtæki sem annast viðgerðina notar og lætur af hendi við þá vinnu sbr. 7. tl. 12. gr. virðisaukaskattslaga. Með föstum útbúnaði skips er eins og fram kemur í greinargerð með frumvarpi til virðisaukaskattslaga aðallega átt við útbúnað sem er fastur við skip, t.d. fjarskiptabúnaður, ratsjá, og önnur siglingatæki, en nær einnig til björgunarbáta og annars öryggisútbúnaðar.
Umrætt ákvæði á ekki við í þeim tilvikum þegar fyrirtæki selur tæki, búnað, efni eða varahluti í skip án þess að annast sjálft viðgerð eða uppsetningu.
Í bréfi yðar kemur fram að fyrirtækið sem um ræðir hvorki tekur björgunarbátana niður né kemur þeim aftur fyrir um borð. Því tekur ákvæði 7. tl. 12. gr. virðisaukaskattslaga ekki til þeirrar þjónustu sem um getur í bréfinu.
Virðingarfyllst,
f.h. ríkisskattstjóra,
Vala Valtýsdóttir