Dagsetning Tilvísun
27. ágúst 1993 521/93
Virðisaukaskattur af útgáfustarfsemi
Vísað er til bréfs yðar, dags. 29. júní 1993, þar sem óskað er eftir staðfestingu fjármálaráðuneytis á því að útgáfur Hagstofu Íslands verði áfram án virðisaukaskatts frá og með 1. júlí 1993 þegar 14% virðisaukaskattur leggst á bækur. Bréf yðar var framsent af fjármálaráðuneytinu þann 24. ágúst s.l. til afgreiðslu hjá embætti ríkisskattstjóra.
Í bréfi yðar kemur fram, að við upptöku virðisaukaskatts 1. janúar 1990 hafi fjármálaráðuneyti staðfest að sömu reglur skyldu gilda um virðisaukaskatt af útgáfum Hagstofunnar og áður höfðu gilt um söluskatt. Samkvæmt því voru allar reglubundnar útgáfur Hagstofunnar innan ritraða hennar undanþegnar söluskatti og síðan virðisaukaskatti frá 1. janúar 1990.
Til svars bréfi yðar skal tekið fram að útgáfa prentvarnings er skráningarskyld starfsemi ef útgáfan er talin vera í atvinnuskyni. Þó er starfsemi ekki skráningarskyld ef samanlagðar tekjur útgefanda af sölu skattskyldrar vöru og þjónustu, þ.m.t. tekjur af auglýsingum og sölu ritsins, eru lægri en 185.200 kr. á ári (miðað við byggingarvísitölu 1. janúar 1993). Það fer svo eftir eðli prentvarnings hvort hann ber 14% eða 24,5% virðisaukaskatt.
Við mat á því hvenær útgáfa telst vera í atvinnuskyni er aðallega miðað við það hvort tilgangur starfseminnar er að skila hagnaði af rekstri eða ekki. Útgáfa telst ekki vera í atvinnuskyni ef samanlagðar auglýsingatekjur og tekjur af sölu eru alltaf eða nær alltaf lægri en kostnaður við aðföng sem keypt eru með virðisaukaskatti til útgáfunnar, þ.m.t. prentkostnaður. Gefi aðili út fleiri en eitt rit er miðað við heildarafkomu fyrirtækisins.
Opinberir aðilar, þ.e. ríki og sveitarfélög, og stofnanir og fyrirtæki þeirra, eru skráningarskyldir að því leyti sem þeir selja vörur eða skattskylda þjónustu í samkeppni við atvinnufyrirtæki. Ríkisskattstjóri lítur svo á að sala opinberra aðila á ritum, sem þeir gefa út, sé aðeins skráningarskyld ef þessar vörur eru seldar með hagnaði. Skráningarskylda er ekki talin vera fyrir hendi ef tekjur af þessari starfsemi eru alltaf eða nær alltaf lægri en kostnaður við aðföng sem keypt eru með virðisaukaskatti til starfseminnar.
Hagstofa Íslands hefur eigi með höndum skráningarskylda starfsemi vegna útgáfustarfsemi sinnar, enda sé hún eigi í atvinnuskyni gerð, sbr. ofan ritað.
Virðingarfyllst,
f.h. ríkisskattstjóra
Bjarnfreður Ólafsson.