Dagsetning Tilvísun
6. júlí 1990 109/90
Virðisaukaskattur – auglýsingar.
Vísað er til erindis yðar, dags. 6. júní sl., varðandi virðisaukaskatt af auglýsingaviðskiptum G . fyrir hönd A við D.
Fjármálaráðuneytið hefur í bréfi dags. 29. maí sl. gert sendiráðinu grein fyrir þeim skilyrðum sem uppfylla þarf til þess að auglýsingabirting í íslenskum fjölmiðli fyrir erlendan auglýsanda sé undanþegin virðisaukaskatti, sbr. reglugerð nr. 194/1990.
Ekki kemur fram í erindi yðar hvers konar starfsemi A hefur með höndum. Verður því að svara erindinu með því að gera með almennum hætti grein fyrir þeim reglum sem gilda hér á landi um virðisaukaskatt af kennslu- og menntastarfsemi.
Eins og fram kemur í bréfi ráðuneytisins er rekstur skóla og menntastofnana undanþegin virðisaukaskatti samkvæmt lögum nr. 50/1988, um virðisaukaskatt. Skattyfirvöld túlka undanþáguákvæðið þannig að það taki til allrar venjulegrar skóla- og háskólakennslu, faglegar menntunar, endurmenntunar, og annarrar kennslu- og menntastarfsemi. Við mat á því hvort nám teljist skattfrjálst er höfð hliðsjón af því hvort boðið er upp á það í hinu almenna skólakerfi eða ekki. Hafi námsgreinin unnið sér fastan sess í hinu almenna skólakerfi ber að lita svo á að skóla- eða námskeiðsgjöld séu skattfrjáls.
Hins vegar eru tómstundanámskeið talin skattskyld stafsemi samkvæmt lögunum.
Virðingarfyllst,
f.h. ríkisskattstjóra,
Ólafur Ólafsson.