Dagsetning Tilvísun
25. maí 1993 476/93
Virðisaukaskattur – auglýsingar vegna hjálparstarfs.
Vísað er til bréfs yðar dags, 26. janúar 1993, þar sem leitað er leiðbeininga vegna framlags stuðningsaðila til hjálparstarfs.
- Spurt er hvort ríkisskattstjóri sjái nokkuð því til fyrirstöðu að fyrirtæki sem styrkja starfið geti gjaldfært það sem auglýsingakostnað. Fyrirtækin fá fyrir fjárframlag stóra korktöflu en á henni mun standa “ við styrkjum A .
Svar: Þegar um auglýsingakostnað fyrirtækja er að ræða þá er heimilt samkvæmt 1. tl. 1. mgr. 31. gr. l. 75/1981 að draga þann kostnað frá tekjum manna í atvinnustarfsemi eða sjálfstæðri starfsemi. Ríkisskattstjóri telur að þau fyrirtæki er styrkja fyrrgreinda hjálparstarfsemi geti gjaldfært auglýsingarnar sem auglýsingakostnað.
- Spurt er hvort slík auglýsingasala sé virðisaukaskattskyld.
Svar: Slík auglýsingasala sem lýst er í bréfinu er virðisaukaskattskyld samkvæmt meginreglu 2. mgr. 2. gr. l. 50/1988 um virðisaukaskatt en þar er kveðið á um að skattskylda nái til allrar vinnu og þjónustu, hverju nafni sem nefnist. Ekki er hægt að fella slíka auglýsingasölu undir undanþágureglur 3. mgr. 2.gr. l. 50/1988 um virðisaukaskatt. Slík sala er aðeins skattskyld ef virðisaukaskattskyld sala fer yfir kr. 185.200 á ári ( miðað við byggingarvísitölu 1. janúar 1993 ).
Virðingarfyllst
f.h. ríkisskattstjóra
Grétar Jónasson