Dagsetning Tilvísun
9. ágúst 1996 747/96
Virðisaukaskattur – innskattsfrádráttur af ýmsum lausum munum um borð í fiskiskipum.
Vísað er til bréfs yðar, dags. 21. júní sl., þar sem óskað er eftir áliti ríkisskattstjóra á ýmsum álitaefnum varðandi innskattsfrádrátt ýmissa muna sem eru keyptir til nota í eldhúsum eða matsölum fiskiskipa eða eingöngu til afnota fyrir áhafnarmeðlimi.
Í bréfinu eru lagðar fram eftirfarandi spurningar:
Er útgerðaraðila heimill innskattsfrádráttur vegna:
- Kaupa á lausum innréttingum, laustengdum rafmagnstækjum þ.m.t. útvarpi og sjónvarpi, myndbandstækjum o.þ.h.?
- Kaupa á eldunaráhöldum, borðbúnaði o.þ.h.?
- Kaupa á farsíma til afnota eingöngu fyrir áhöfn?
- Kaupa á lausum innréttingum í íbúðum áhafnarmeðlima, þ.m.t. útvarp, sjónvarp, tölvur, tengingar fyrir farsíma o.þ.h.?
- Kaupa á t.d. líkamsræktartækjum til nota fyrir áhöfn?
Til svars bréfinu skal fyrst vikið að hinum almennu reglum virðisaukaskattslaga um innskattsfrádrátt en í 1. mgr. 16. gr. laga nr. 50/1988 segir að til innskatts á hverju uppgjörstímabili skuli telja virðisaukaskatt af aðkeyptum rekstrarfjármunum,vörum, vinnu, þjónustu og öðrum aðföngum sem eingöngu varða sölu skattaðila á vörum og skattskyldri þjónustu. Í athugasemdum með frumvarpi til laganna segir að með ákvæðinu sé því slegið föstu að til innskatts megi aðeins telja virðisaukaskatt af innkaupum o.s.frv. sem eingöngu varðar sölu (veltu ) skattskyldrar vöru eða þjónustu.
Í 3. mgr. sama ákvæðis eru síðan talin upp í sex liðum ýmis aðföng sem ekki koma til greina við uppgjör innskatts. Í 1. tölul. 1. mgr. kemur fram að óheimilt er að telja til innskatts aðföng er varða kaffistofu og mötuneyti skattaðila og hvers konar fæðiskaup hans. Samkvæmt þessu er óheimilt að telja til innskatts virðisaukaskatt af þeim aðföngum sem eru keypt til nota í þessum tilgangi og er því svar við tveimur fyrstu liðum fyrirspurnar yðar neitandi.
Í liðum 3, 4 og 5 í fyrirspurninni eru talin upp ýmis aðföng til afnota fyrir áhafnarmeðlimi og spurt hvort heimilt sé að telja virðisaukaskatt af þeim til innskatts, þ.e. kaup á farsímum, útvörpum, sjónvörpum, tölvum, líkamsræktartækjum o.fl. til afnota fyrir áhafnarmeðlimi. Til svars þessu þá er samkvæmt 3. tölul. 3. mgr. 16. gr. laganna óheimilt að telja til innskatts virðisaukaskatt af innkaupum er varða hlunnindi til starfsmanna og skiptir ekki máli hér að heimilt er að telja sum þeirra aðfanga til rekstrarkostnaðar samkvæmt lögum nr. 75/1981, um tekju- og eignarskatt. Það er því álit ríkisskattstjóra að telja verður að slík innkaup komi ekki til greina við uppgjör innskatts.
Virðingarfyllst,
f.h. ríkisskattstjóra,
Vala Valtýsdóttir.