Dagsetning Tilvísun
15.06.2004 08/04
Virðisaukaskattur – mótssvæði hestamanna – innskattsréttur
Ríkisskattstjóra hefur borist bréf yðar, dags. 5. apríl 2004, þar sem þess er farið á leit við embættið að það veiti Rangárbökkum, hestamiðstöð Suðurlands ehf. heimild til að innskatta framkvæmdir sem félagið stóð í á síðastliðnu ári. Í bréfinu kemur fram að félagið er eigandi mótssvæðis hestamanna á Gaddstaðaflötum við Hellu. Á síðastliðnu ári stóð félagið fyrir endurbótum á mótssvæðinu; völlunum, áhorfendabrekkum og bílastæðum. Af efni bréfsins má ráða að þér teljið félagið eiga innskattsrétt vegna áðurnefndra framkvæmda þar sem á mótssvæðinu fari fram all nokkur virðisaukaskattsskyld starfsemi. Sem dæmi þá er nefnd sala á aðgangi og veitingum á landsmóti hestamanna nú í sumar, árlegar kynbótasýningar Búnaðarsambands Suðurlands þar sem þátttakendur greiða skráningargjöld með virðisaukaskatti og töðugjaldahátíðir með skattskyldu dansleikjahaldi.
Til svars við erindi yðar vill ríkisskattstjóri taka eftirfarandi fram:
Það er hlutverk skattstjóra að ákvarða virðisaukaskatt skráðra aðila og því felur svar þetta ekki í sér skattákvörðun samkvæmt 25. eða 26. gr. laga nr. 50/1988, um virðisaukaskatt (vsk-laga). Svarið felur heldur ekki í sér bindandi álit af þeim toga sem kveðið er á um í lögum nr. 91/1998, um bindandi álit í skattamálum. Svarið er sett fram á grundvelli þess samræmingar- og leiðbeiningarhlutverks sem ríkisskattstjóra er falið í 1. mgr. 39. gr. vsk-laga. Sem slíkt felur svarið í sér almennt álit ríkisskattstjóra á virðisaukaskattsskyldu og rétti til færslu innskatts.
Skattskyldusvið virðisaukaskatts er skilgreint í 2. gr. laga nr. 50/1988, um virðisaukaskatt með síðari breytingum. Skattskyldan nær annars vegar, skv. 1. mgr. 2. gr., til allra vara og verðmæta, nýrra og notaðra. Hins vegar tekur skattskyldan, skv. 2. mgr. 2. gr., til allrar vinnu og þjónustu hverju nafni sem nefnist, sem ekki er sérstaklega tiltekin undanþegin virðisaukaskatti í 3. mgr. umræddrar 2. gr. Þýðing undanþáganna í 3. mgr. 2. gr. er sú að hvorki ber að innheimta virðisaukaskatt af þeirri þóknun sem sá er þjónustunnar nýtur er krafinn um, né ber að reikna og standa skil á virðisaukaskatti af andvirði slíkrar þjónustu sem látin er í té endurgjaldslaust. Undanþágurnar þýða hins vegar ekki að sá sem undanþegna þjónustu veitir geti keypt virðisaukaskattsskyld aðföng til starfsemi sinnar án greiðslu virðisaukaskatts. Þá fæst virðisaukaskattur af aðföngum ekki endurgreiddur úr ríkissjóði í formi innskatts. Þannig ber sá sem undanþegna þjónustu veitir almennt virðisaukaskatt af aðföngum er varða hina undanþegnu þjónustu.
Virðisaukaskattskyldum aðila er heimilt að færa til innskatts á hverju uppgjörstímabili virðisaukaskatt af aðkeyptum rekstrarfjármunum, vörum, vinnu, þjónustu og öðrum aðföngum sem eingöngu varða sölu skattaðila á vörum og skattskyldri þjónustu með þeim takmörkunum þó sem leiða af 16. gr. vsk-laga. Ef starfsemi aðila er að hluta til virðisaukaskattsskyld og að hluta til undanþegin virðisaukaskatti, sbr. 3. mgr. 2. gr. vsk-laga, þá fer um innskattsrétt hans eftir II. kafla reglugerðar nr. 192/1993, um innskatt.
Samkvæmt upplýsingakerfi ríkisskattstjóra var félagið skráð á virðisaukaskattsskrá frá 1. janúar 2001 með hrossarækt sem atvinnugrein. Ríkisskattstjóri sér ástæðu til að minna á að samkvæmt 1. mgr. 5. gr. vsk-laga ber að tilkynna til skattstjóra allar breytingar sem verða á starfsemi eftir að skráning hefur farið fram eigi síðar en átta dögum eftir að breyting á sér stað.
Virðingarfyllst
f. h. ríkisskattstjóra
Guðrún Þorleifsdóttir
Guðlaug M Valdemarsdóttir