Dagsetning Tilvísun
1. mars 1995 670/95
Virðisaukaskattur- námsstefna – fagmenntun
Vísað er til bréfs yðar, dags. 28. febrúar 1995, þar sem óskað er álits ríkisskattstjóra á því hvort námsstefna um hraðvirkar mæliaðferðir í matvælaiðnaði sé undanþegin virðisauka-skatti skv. 3. tölul. 3. mgr. 2. gr. virðisaukaskattslaga.
Í bréfi yðar segir m.a.:
“Námsstefnan er haldin til að auka þekkingu þeirra sem starfa í matvælaiðnaði eða í þjónustu við hann. Hún er ætluð fólki sem starfar við matvælarannsóknir eða í eftirliti með matvælum, framleiðslustjórum, gæðastjórum og eftirlitsaðilum.
Á allra síðustu árum hefur umhverfi matvælaiðnaðarins breyst verulega, aðallega vegna aukinna krafna um gæðaeftirlit og innra eftirlit. Samstíga þessum breytingum hafa átt sér stað breytingar í matvælafræðinni, einkum m.t.t. hraðvirkra og einfaldra mæliaðferða.
Starfssvið starfsmanna, stjórnenda fyrirtækja og eftirlitsaðila í matvælaiðnaði hafa ennfremur tekið breytingum, einkum m.t.t. þeirrar aðferðarfræði sem beitt er við eftirlitið. Kröfur um þekkingu eru þar orðnar aðrar en áður.”
Af bréfi yðar má ráða að námsstefnan sé haldin til að auka fagþekkingu þeirra sem starfa við matvælaiðnað með því að kynna nýja tækni og aðferðir við gæðastjórnun í starfsgreininni.
Til svars erindinu skal tekið fram að skv. 3. tölul. 3. mgr. 2. gr. laga nr. 50/1988, um virðisaukaskatt er starfsemi skóla og menntastofnana undanþegin virðisaukaskatti. Í athugasemdum við frumvarp til virðisaukaskattslaga kemur fram að með “starfsemi skóla og menntastofnana” sé átt við alla venjulega skóla- og háskólakennslu, faglega menntun, endurmenntun og aðra kennslu- og menntastarfsemi sem hefur unnið sér fastan sess í hinu almenna skólakerfi. Ekki nægir í þó í þessu sambandi að boðið sé upp á námsgreinina eða námsbrautina í einstökum skólum heldur verður námið að hafa unnið sér fastan og almennan sess í skólakerfinu.
Samkvæmt framansögðu er fagleg menntun, þ.m.t. endurmenntun, undanþegin virðisauka-skatti. Þannig eru námskeið og ráðstefnur sem geta talist liður í fagmenntun þátttakenda undanþegin virðisaukaskatti. Við mat þess hvenær um fagmenntun er að ræða leggur ríkisskattstjóri áherslu á að kennslan miði að því að viðhalda eða auka fagþekkingu eingöngu vegna atvinnu þátttakenda.
Ráðgjafaþjónusta fyrir einstök fyrirtæki er hins vegar ávallt skattskyld enda þótt hún sé í formi námskeiðs.
Með vísan til þess sem að framan greinir og þess að námsstefnan er opin almenningi virðist vera um að ræða faglega menntun sem er undanþegin virðisaukaskatti sbr. 3. tölul. 3. mgr. 2. gr. virðisaukaskattslaga og ber því ekki að innheimta virðisaukaskatt af þátttökugjöldum.
Virðingarfyllst,
f.h. ríkisskattstjóra,
Vala Valtýsdóttir