Dagsetning                       Tilvísun
10. september 1996                             751/96

 

Virðisaukaskattur – útflutningur hrossa.

Vísað er til fundar með yður 13. október 1995 og bréfs yðar dags. sama dag sem móttekið var hjá ríkisskattstjóra 25. október s.á. Í bréfi þessu er óskað frekari leiðbeiningar og skýringa um útflutning hrossa en settar voru fram í bréfi ríkisskattstjóra þess efnis þann 3. júní 1993.

Í fyrrnefndu bréfi ríkisskattstjóra eru settar fram reglur sem gilda um sölumiðlun til útflutnings (flutningsmiðlun). Í því bréfi er gengið út frá að seljandi hrossins greiði fyrir þá útflutningsumsýslu sem flutningsmiðlari leggur til og verðið sem fram kemur á útflutningsskýrslu endurspegli m.a. þann kostnað.

Fyrirspurn yðar lýtur einkum að því hvað muni gilda í tilfellum þar sem hinn erlendi kaupandi greiðir flutningsmiðlara beint fyrir útflutningsumsýslu. Ríkisskattstjóri telur þjónustu flutningsmiðlara sem tengist útflutningi á hrossum undanþegna virðisaukaskatti í slíkum tilvikum, sbr. 3. tölul. 1. mgr. 12. gr. laga um virðisaukaskatt, nr. 50/1988, enda séu uppfyllt eftirtalin skilyrði:

  1. Þjónustan komi fram á útflutningsskýrslu og verð hennar sé tilgreint sérstaklega sem þáttur í heildarútflutningsverði, FOB (sbr. reiti 5 og 9, sjá dæmi um útfyllingu á meðfylgjandi útflutningsskýrslu). Tekið skal fram að í reitinn „Flutningsgjald“ neðarlega á skýrslunni skal einungis færa flutningskostnað vegna millilandaflutninga eða heildarflutningskostnað þegar gerður hefur verið einn flutningssamningur um flutning innanlands og flutning úr landi.
  2. Útflutningsskýrslu skulu fylgja frumrit reikninga frá seljendum hrossanna, upprunavottorð, skoðunarvottorð dýralæknis, auk farmbréfs og annarra fylgiskjala sem tollayfirvöld kunna að krefjast, sbr. reglugerð nr. 228/1993, um tollskýrslur og fylgiskjöl þeirra.
  3. Flutningsmiðlari skal geyma í bókhaldi sínu afrit af umræddum gögnum til sönnunar á því að sala þeirra á þjónustu tengist vörusölu úr landi.

Að gefnu tilefni vill ríkisskattstjóri ítreka að flutningsmiðlara er óheimilt að gefa út reikning í sínu nafni fyrir sölu á hrossum sem ekki eru í eigu þeirra eða umsýslusölu. Af hálfu aðila sem stunda flutningsmiðlun hefur því verið haldið fram að það skapi erfiðleika við tollafgreiðslu á erlendri grund ef lagðir eru fram margir sölureikningar með útflutningsskýrslu í stað eins. Af því tilefni skal á það bent að það er viðurkennt við tollframkvæmd að miðlari gefi út í sínu nafni skjal sem eingöngu hefur gildi við tollmeðferð. Á því má draga saman meginupplýsingar um hvert og eitt útflutt hross ásamt umsýsluþóknun flutningsmiðlara. Þetta skjal skal auðkenna með „Pro forma invoice for Customs purposes only“ og verður það ekki lagt til grundvallar tekjufærslu í bókhaldi heldur þjónar þeim tilgangi einum að einfalda tolleftirlit og tollafgreiðslu. Eftir sem áður er skylt að leggja fram við útflutning frumrit allra reikninga sem standa að baki sölu úr landi eins og áður er tekið fram.

Hvað seljanda áhrærir er grundvöllur þess að telja sölu á hrossi til erlends aðila til undanþeginnar veltu sá að það verði flutt út landi. Annist seljandi ekki sjálfur útflutning er skilyrði fyrir undanþágu að fyrir liggi skriflegt samkomulag um afhendingu í útflutningshöfn eða innflutningshöfn í öðru landi og um tiltekinn afhendingardag. Að þessum skilyrðum uppfylltum er ber að telja til undanþeginnar veltu sölu skv. útgefnum reikningi svo og greiðslur sem fram fara fyrir útgáfudag reiknings eða afhendingardag. Hafi útflutningur ekki farið fram á umsömdum afhendingardegi eða fyrr ber að leiðrétta veltu viðkomandi tímabils. Þegar afhendingarstaður er útflutningshöfn eða innflutningshöfn í öðru landi er eðlilegt er að útgáfa reiknings sé samtíma gerð útflutningsskýrslu. Á útflutningsskýrslu skal vera tilvísun sem tengir hana við útgefinn reikning seljanda.

Tekið skal fram að bréf ríkisskattstjóra nr. 477 frá 3. júní 1993 heldur gildi sínu enda er tekið á annarri tegund viðskipta en hér greinir í því. Þjónustu flutningsmiðlara við innlenda aðila ber þannig ætíð að selja með virðisaukaskatti og gildir þá einu hvort kaupandi er virðisaukaskattsskyldur aðili eða ekki.

Þá er spurt hvað gildir í þeim tilvikum þegar seljandi annast útflutning sjálfur á FOB- eða CIF-verði. Um það gilda almennar reglur um útflutning, þ.e. að söluverð útfluttrar vöru er undanþegið skattskyldri veltu og innifalinn í því verði er kostnaður við flutning til útskipunarstaðar, geymsla á útskipunarstað og annar kostnaður sem fellur á vöru þar til hún er komin um borð í útflutningsfar. Sem fyrr er skilyrði að undanþegin sala sé studd fullnægjandi gögnum s.s. útflutningsskýrslu og reikningi á nafn kaupanda erlendis.

Í þriðja lagi er tekið dæmi um útflutning á óseldum hrossum og spurt hvað gildi í slíkum tilvikum um virðisaukaskatt. Virðisaukaskattur er einungis lagður á þau viðskipti sem eiga sér stað innanlands sbr. 1. gr. virðisaukaskattslaga nr. 50/1988. Íslenskur virðisaukaskattur verður því ekki lagður á í þessum tilvikum en líklegt að lagður verði á veltuskattur í viðkomandi innflutningslandi. Þar sem söluverðmæti hrossanna liggur ekki fyrir við útflutning þarf að meta verð skv. reglum tollalaga til færslu á útflutningsskýrslu.

Að lokum skal bent á að í undirbúningi hjá ríkisskattstjóra er útgáfa leiðbeininga um útflutning þar sem m.a. verður fjallað heildstætt um útflutning á hrossum.

 

Virðingarfyllst,

f.h. ríkisskattstjóra,

Jón H. Steingrímsson