Dagsetning Tilvísun
22. feb. 1991 248/91
Virðisaukaskattur vegna greinarskrifa og teikninga.
Vísað er til bréfs yðar, dags. 16. febrúar 1990, þar sem óskað er álits ríkisskattstjóra hvort greiða skuli virðisaukaskatt í eftirfarandi tilvikum:
- Vegna greinarskrifa í tímarit.
- Vegna kaupa á teikningum við greinar í tímarit.
Til svars erindinu skal eftirfarandi tekið fram:
Um 1. lið:
Starfsemi rithöfunda er undanþegin virðisaukaskatti, sbr. 12. tölul. 3. mgr. 2. gr. laga um virðisaukaskatt. Sú starfsemi að rita grein í blað eða tímarit gegn gjaldi fellur hér undir.
Um 2. lið:
Sala listamanna á eigin myndskreytingum og teikningum til notkunar sem ritstjórnarefni í dagblaði eða tímariti er undanþegin virðisaukaskatti, sbr. 2. tölul. 4. gr. laga um virðisaukaskatt. Sé birtingarréttur framseldur eingöngu, þ.e. þegar ekki er um að ræða eiginlega sölu á listaverki, er salan undanþegin á grundvelli 12. tölul. 3. mgr. 2. gr. laganna. Skilyrði samkvæmt báðum þessum ákvæðum er að um sé að ræða eigin verk seljanda, að öllu leyti gert í höndum, og að ekki sé um að ræða auglýsingateikningu. Að öðru leyti vísast til bréfs ríkisskattstjóra frá 8. maí sl. sem hjálagt fylgir til fróðleiks.
Virðingarfyllst,
f.h. ríkisskattstjóra,
Ólafur Ólafsson.