Dagsetning Tilvísun
20. mars 1995 675/95
Vísað er til samtala við yður og í framhaldi af því bréfs yðar dags. 4. nóvember 1994, þar sem leitað er álits ríkisskattstjóra á því, hvernig virðisaukaskattsskyldu B, til heimilis að S, Reykjavík, er háttað í sambandi við framkvæmdir á ótilgreindri lóð R .
Eftirfarandi kemur fram í meðfylgjandi minnisblaði og bráðabirgðaleigusamningi:
„Byggingarlóðin verður eign R, B. er leigutaki lóðarinnar.
Leigutaki ber kostnað af gerð eftirtalinna mannvirkja á lóðinni:
Landgerð.
Skolp- og regnvatnslagnir ásamt vatnslögnum.
Gatnagerð.
Hafnargarðar og bátabraut.
Hafnarkantur.
Dýpkun hafnar.
R eignast ofangreind mannvirki um leið og gerð eru.
Gatnagerðargjöld og holræsagjöld vegna bygginga á svæðinu falla niður, svo og lóðarleiga í 40 ár.
R annast rafmagns- og hitalagnir innan lóðarinnar, B. mun greiða viðeigandi heimtaugagjöld.
B. kostar gerð bílastæða og frágang opinna svæða.“
Svo virðist sem B. muni innheimta gatnagerðargjöld og heimtaugargjöld af íbúðar- og atvinnuhúsnæði til byggingaraðila, ásamt tilheyrandi bílastæðum, að undanskildum bílastæðum sem tengjast höfn. Ennfremur virðist B koma til með að innheimta lóðarleigu vegna bygginganna í 40 ár, skv. gjaldskrá R.
Rekstur hafnarinnar og innheimta leigu vegna hafnaraðstöðu virðist samkvæmt framlögðum minnisblaði vera á vegum B. í 40 ár.
Allir skattar og opinber gjöld til opinberra þarfa, sem lögð verða á leigulóð greiðast af leigutaka.
Miðað við fyrirliggjandi upplýsingar er það álit ríkisskattstjóra að hér sé um að ræða verktakasamband á milli B. og R. Verktakagreiðslurnar eru í formi niðurfellingar á gjöldum af hálfu R samfara heimild til B að innheimta viðkomandi gjöld af kaupendum og notendum umræddra mannvirkja. Gegn því að gefa eftir gjöldin gagnvart B, verður R eigandi allra mannvirkja strax og þau verða til. Verður því að álykta sem svo, að umrædd eftirgjöf á gjöldum sé í raun endurgjald fyrir verkið.
B. telst því vera í virðisaukaskattsskyldri starfsemi og ber því að skila virðisaukaskatti af áðurnefndum framkvæmdum skv. almennum ákvæðum virðisaukaskattslaga og reglugerðum settum skv. þeim.
Virðingarfyllst,
f.h. ríkisskattstjóra
Vala Valtýsdóttir